Euskal Herrian kontserbatzen den zeramika labe adibide onenetakoa da Zubiate, eta egunera arte iritsi den mota honetako testigantza bakarra Gipuzkoan. Bere izena bertan lan egin zuen azken ontzigile Felix Zubiaterengandik jasotzen du, 1910ean buztingintza utzi zuena. XX. mende hasieran, hain zuzen ere, erabilera eta ohitura berrien sartzeak eta industria-garapenak berak, antzinako ogibide horietako askoren gainbehera ekarri zuten, ontziak kalean eguzkitan lehortzen bezalako ohiko estanpak atzean utziz.
1974an aurkitu zuen Enrique Ibabe zeramikan aditua den ikertzaileak beste instalazio batzuen artean ahaztutako eta ezkutatutako harribitxi hau. Aranzadi Zientzia Elkarteak zaharberritu eta sendotu zuen ostera, milurteko honen hasieran, eta erakusketa iraunkor baten bidez jarri zen balioan. Bertan, Bittoriano Larrañaga bergararraren bilduma aberatsa erakusten da, etxe erabilerako ontziz osatua.
Orain dela gutxi arte gurean hain errotuta zeuden lur egosiaren inguruko artisau, arte eta industria-jardunbideei buruz gehiago jakin nahian, hurbil zaitez XIX. mende erdialdeko buztindegi paregabe honetara. Zatoz Zubiateko labea ezagutzera.
